Sujet

A Curnachjaghja 

A Curnachjaghja era una piana à rente à fiume, quaghjò à trè chilometri da u paese ; locu freddosu è spostu à u ventu. Per ghjunghjeci si passava per un chjassu, longu à u cimiteriu cù i so cipressi tamanti. U locu, secondu i più vechji, era sempre statu cunsideratu cum’è stranu, è ancu maladettu. Si parlava d’una donna, chì un seculu nanzu, era falata à cogliesi una manata di funghi, è chì vultò currendu spaventata in paese. Avia intesu scaccanate è voci chjamendula da u so nome. U fattu hè chì a povera donna, per a vita, ne firmò muta…

À centu passi, un vechju mulinu mezu piattu da i castagni ; ci stava Chjochjula a mulinaghja cugnumata dinò a strega.

Mulinaghja, chjochjula era sempre stata fin’à a morte di u so maritu, e linguacce dicianu ch’ella l’averai avvelenatu. A chjamavanu Chjochjula pò esse per via di a fiaccula di a lumerella chì si vidia da u stradone, quand’ella facia, di notte, l’avvinta di a so casa. Ma una chjochjula hè dinò un fischju per chjamà l’acelli. Acelli, in fatti, ella n’avia sempre in giru à u mulinu, è unu mansu mansu, bellu spessu nantu à una spalla.

Issi acelli eranu curnachje. Era una donna magrintina Chjochjula, appena ingrunchjata, ma sgualtra, u sguardu vivu, i so capelli sempre lintati eranu grisgi, a so faccia guizza, denti n’avia pochi, u nasu fine è appinzatu, l’ochji chjari è chjuchi ma crudeli è e so mani secche. Era sempre vestuta di grisgiu, in paese ùn ci cullava tantu. Chì ci avia da fà ? S’ellu ùn era per cumprassi una cria di caffè ind’è Anghjula Stella… u restu, ella avia tuttu… infine vene à dì pochi affari… manghjà ùn averà manghjatu tantu. È po à quell’epica a manghjusca era scarsa. Parlava pocu è micca. I zitelli a stuzzicavanu, ma sempre da luntanu, piattendusi in i purtoni chì n’avianu a paura. Ma in a Curnachjaghja i zitelli ùn ci falavanu mai…

Antone Filippi

 I. À nantu à u testu (20 punti)

A. Chì sò i tema di u scrittu ? (8 punti)

B. Qualesse sò e parolle chì facenu capì chì A Curnachjaghja hè un locu ch’ellu ci vole à fughje ? (6 punti)

C. Chì ci sarà ind’è « Chjochjula » chì face a paura ? (6 punti)

II. Cunniscenza di a lingua (20 punti)

A. Spiecate e parolle (4 punti) :

- à rente à

- una cria

- pocu è micca

- scaccanate

B. À chì tempu è chì modu sò i verbi (5 punti) :

- firmò

- ghjunghjeci

- parlava

- si vidia

- ùn averà (manghjatu)

C.Chì si pò dì di a forma verbale « ùn averà manghjatu tantu » : u significatu sarà quellu di u futuru ? (5 punti)

D. Rilevate trè prupusizione sfarente (pè a grammatica) intrudutte da chì. (6 punti)

III. Spressione persunale

A. Imaginate u seguitu di issu scritte in quindeci o vinti filari. (10 punti)

B. Chì ne sapete di i misteri in Corsica ? Qualesse sò e cridenze chì ci eranu tandu o forse ancu avale in i paesi ? (10 punti)