Sujet

L’ortu di ziu

L’ortu di ziu era pienu,
Di frutti rari è suchjosi,
Stringhjia in u so senu,
I fiora più maraviddo
Erani in ortu di ziu…

Ci era fica, uva muscata,
Pira, preschi, bombuccona,
Una lenza imbalsamata,
Da u muscu di i milona,
Ma l’arrigalava tutta,
U me ziu, quidda frutta…

 Sutt’à a chjalza frunduta,
Si pisaia una casetta,
Fatta di petra minuta,
Par salvassi da a saietta,
À un chjodu di a porta,
Era appiccata una sporta…

 Versu u puzzu fiuritu,
Un sarpenti s’agguattaia,
Sì, quand’iddu era famitu,
Da l’acqua s’avvicinaia,
Era guasgi sempri crochja,
A tintaredda ranochja…

 Tutti l’anni à a branata,
Ci era un nidu di pincionu,
Annant’à a mela granata,
Ziffa à l’orlu di u strittonu,
In a baracocca vicina,
Un antru di cardalina,

Cù l’inguernu, un pettirussu,
Da ziu staia vicinu,
Li saltaia guasgi addossu,
Quandu vangaia un sulcinu,
È sì ziu li parlaia,
L’acidduchju chjuchjulaia…

 Oghji l’ortu hè tralasciatu,
A casetta ùn hà più tettu,
U cataru hè lampatu,
È l’acqua faci difettu,
U pargulu si n’hè stortu,
Dapoi chì ziu hè mortu…

 A lamaghja hè vultata,
Più crudeli è più mischina,
Di l’ortu s’hè vindicata,
Di tanti anni di schirzina,
Ma nimu l’hà datu tortu,
Dapoi chì ziu hè mortu…

 Cussì sò i paisoli,
Chì in Corsica sò spariti,
Quandu i vichjareddi, soli,
Si ni sò tutti partiti,
Par andà in l’ortu di Diu,
Indù godi u me ziu…

 Marcu Ceccarelli

A. Annantu à u testu

1. Qualissi sò i paroli chì facini capì chì l’ortu di ziu hè una maravidda ?

2. Chì sintimi palesani l’ultimi dui strufati ?

3. Spiccheti i trè parti d’issa puisia è diti qualissi sò i tema d’ugnuna.

4. Vi pari urighjinali u sughjettu trattatu da Marcu Ceccarelli ?

B. Cunniscenza di a lingua

1. Sò ghjusti i plurali fiora, pira, bombuccona, milona ?

2. Turneti à scriva in supranacciu a sesta strufata.

3. Erani in ortu di ziu ; Da u muscu di i milona : chì sprimini i pripusizioni in è da ?

4. Di l’ortu s’hè vindicata ; nimu l’hà datu tortu : spiicheti l’ausiliarii hè è hà.

C. Sprissioni parsunali

1. Ziu, di ritornu annant’à a so tarra, vidi u so ortu. Cuntetici i so riazzioni.

2. Qualissi poni essa i raghjò di l’abbandonu di i nosci loca ? Sarani listessi chè pà a lingua ? Deti u vosciu parè.