Sujet

Fantasimi

A notte era digià quasi calata quand’attaccai l’ultime giratacce prima di ghjunghje propriu nant’à u litturale. Era una strada ch’io facia in vittura à bastanza à spessu pè u mo travagliu, face chì surprese mi ne lacava più poche, ma in fin di viaghju a fatica mi pigliava più di una volta, è temia sempra d’ùn alluppicammi à u chjerchju.

Ma issa sera a vittura andava linda, cum’è da per ella, è paria ch’ella sculiscessi nant’à quellu catramu sopr’à un nuvulu di silenziu pagnu : u cunduttore si sentia bè : à l’attrachjata, quandì a stalla s’avvicina, ancu u sumere si crede più legeru. In più bella, cum’o escia da una trincata secca, vidi una quatrera di casa chì sfilava à latu mancu, illuminata è di vita piena. Fermai una cria sbiguttitu sopr’à u colpu, ma penserete : chì ci saria di strasurdinariu à truvà case longu à stradoni ? Eramu custì à puntu in u locu più disertu di u rughjone, duve u fiume seguita u stradone vultuloni da chilometri è chilometri, senza ch’ellu si possa scuntrà mai nè casa nè omi : - fussetti tosi, è basta ! Sò lochi ingrati di natura chì ùn volenu pruduce chè scogli è renaghji, liati di quandu in quandu da qualchì prunaghju incirlitu. Pè divvi… Hè per quella chì una casa custì… Sciaccai un colpu di frenu è a vittura fece a piantata, ma slanciata era troppu è po, à dilla franca l’affare mi intrigava senza dammi voglia d’andà à cuntrullà da vicinu. Cusì inciaccai torna l’acceleratore è mi sfughjì quella visione in u retrospechju. Ebbi u tempu di vede — ma quantu durò l’affare ? Quant’è di pensalla ! — una spezia di fantasimu chì mi ferma impressa ancu avale : ci era ghjente à è finestre chì smanittavanu cum’è in camisgia di notte, certi currianu davanti à ì purtoni aperti, l’altri stavanu in pede, intrepiti longu à i muri alti…

Uni pochi mi paria ch’elli avissinu ferri di travagliu in manu, stuvigli è attracci è per contu meo discurrianu trà di elli chì si vidianu riminà e so labre… Ma ùn ebbi asgiu di sente nisun rimore, è a vitezza di a vittura m’alluntanò in quattru è quattru ottu da issu spettaculu stranu…

Ghjacumu Fusina

I. Annantu à u testu

1. Spiecate :

« temia sempre d’ùn alluppicammi à u chjerchju »

« à l’attrachjata, quandì a stalla s’avvicina, ancu u sumere si crede più legeru »

2. Issu fattu sarà finzione o realità ? Allistinate è cumintate l’elementi ogettivi di a descrizzione propiu è l’elementi sugettivi d’appriziazione.

3. Circate di definisce a tunalità di u racuntu.

II. Cunniscenza di a lingua

1. Chì sensu anu in lu testu e parolle « rughjone » Precisate a natura di e parolle « quellu », « quella », spiecate u valore ch’elle anu in lu cuntestu.

3. Scrivite à u prisente :

« … è paria ch’ella sculiscessi… »

« Uni pochi mi paria ch’elli avissnu ferri di travagliu in manu ».

Spiecate a cuncurdenza di i tempi.

4. Dite in suttanacciu a prima infrasata.

III. Spressione persunale

1. Ghjuntu in casa u narratore conta u fattu à a moglia chì ùn ci crede tantu… Scrivite u cuntrastu.

2. Ne cunniscite fenomeni strani cum’ellu dice Ghjacumu Fusina ? Si pudaranu spiecà ?